陳國邦羅敏莊夫婦帶同囡囡陳禛、楊證樺一家三口及應昌佑等今日喺會展出席香港兒童才藝學院開幕，梁梓禧（前名：梁奕倫）以執行董事身份現身。陳國邦嘅5歲半囡囡陳禛喺合照時大擺甫士，事後佢話鍾意唱歌、跳舞、彈琴、畫畫同游水。講到陳禛好有天份，羅敏莊話：「我覺得麻麻地，今日有好多小朋友仲叻，多才能；我細個嘅時候，因為爸爸做警察，所以帶我返差館叫我唱《上海灘》，當時我4歲。」此時，陳禛即場表演唱歌，問到會唔會批准陳禛入行？羅敏莊話：「o依家大家影住佢，都好似入咗行咁，我冇刻意。」講到陳國邦同羅敏莊分別係呢間學院嘅戲劇及唱歌顧問，陳國邦表示會參與設計課程及親自教授。
至於楊證樺、太太沈可欣同兩歲大嘅囝囝楊宏志（Eugene）一齊受訪，楊證樺叫Eugene飛吻，但佢就咀嘴爸爸，十分可愛！沈可欣指Eugene讀緊學前班，但想俾囝囝學游水，楊證樺話：「最緊要身體健康，其他冇得逼，等佢自由發揮，我哋唔係怪獸家長，咁想小朋友冇咗個童年，俾佢上學前班，係因為我哋啲親戚朋友冇同齡嘅小朋友，所以俾佢接觸下社群。」會唔會追多個小朋友？楊證樺表示：「努力中，我都想生個女。」
精選娛聞，喺晒《娛果》
http://fb.com/appledailyent
https://hk.entertainment.appledaily.com/enews/realtime/article/20180520/58216909
Search